Байден Исроилга боради
Ташриф давомида Байденга Исроилнинг ҳарбий мақсадлари ва стратегияси ҳақида маълумот берилади.
АҚШ президенти Жо Байден 18 октябрь куни Исроилга ташриф буюради. Бу ҳақда АҚШ Давлат котиби Энтони Блинкен маълум қилди.
“Биринчидан, президент АҚШнинг Исроил билан бирдамлигини ва унинг хавфсизлигига содиқлигимизни яна бир бор тасдиқлайди. Иккинчидан, президент Байден ушбу инқироздан фойдаланиб Исроилга ҳужум қилмоқчи бўлган ҳар қандай давлат ёки нодавлат субъектларига бундай қилмаслик ҳақида аниқ хабаримизни юборади”, — деди Блинкен.
Ташриф давомида Байденга Исроилнинг ҳарбий мақсадлари ва стратегияси ҳақида маълумот берилади. Блинкеннинг қўшимча қилишича, АҚШ президенти Исроил армияси ҳарбий амалиёт давомида “тинч аҳоли орасида қурбонларни минималлаштириш ва гуманитар ёрдамнинг ҲАМАС қўлига тушмасдан, Ғазо секторидаги тинч аҳолига етиб боришини” таъминлаш борасидаги режалари билан танишмоқчи.
Аввалроқ Блинкен Яқин Шарққа сафари доирасида Исроилга ташриф буюрганди. У Исроилдан ташқари Иордания, Қатар, Баҳрайн, Миср, Саудия Арабистони ва Бирлашган Араб Амирликларида бўлди.
АҚШ Мудофаа вазири Ллойд Остин ҳам Исроилга келди. У ҳамкасби Ёав Галант билан учрашди. Пентагон раҳбари уни Қўшма Штатлар Исроилни кучли қўллаб-қувватлашига ва Тел-Авивни “ўзини ҳимоя қилиш учун зарур бўлган ҳамма нарса билан” таъминлашига ишонтирди.
