UzAuto Motors сотувда йўқ автомобиллар нархини 9 миллион сўмгача оширди
Lacetti, Damas, Labo вa Cobalt нархлари қимматлашди.
UzAuto Motors компанияси бир қатор оммабоп автомобилларнинг нархларини оширди. Chevrolet.uz сайтидаги янгиланган маълумотларга кўра, Lacetti, Damas, Labo вa Cobalt моделларига нархлари 4,7 миллион сўмдан 9 миллион сўмгача қимматлашган.
Қимматлашган комплектацияларнинг янги нархлари:
Lacetti L-Style Plus AT: 169 118 000 сўм(эски нархи – 160 868 000 сўм);
Damas D2 DLX Style Plus: 96 932 000 сўм(эски нархи – 92 204 000 сўм);
Labo LB2 Plus: 96 370 000 сўм(эски нархи – 91 669 000 сўм);
Cobalt GS-Style Plus MT: 119 542 000 сўм(эски нархи – 113 711 000 сўм);
Cobalt GX-Style Plus AT:141 181 000 сўм (134 294 000 сўм).
Эслатиб ўтамиз, компания оммабоп моделлари сотувини 8 ойлик танаффусдан кейин шу йил август ойи бошида қайта тиклади. Ўшанда автосалонларда кузатилган авиотаж фонида 50 мингдан ортиқ автомобиль учун шартномалар бир сутка ичида тарқатиб бўлингани айтилганди. 18 сентябрь куни эса қўшимча шартнома бериш бошлангани кўпчиликнинг узоқ кутилган қувончи бўлди, бироқ орадан 2 соат ўтар-ўтмас 28 мингта шартнома тугагани, жараён эса тўхтатилгани маълум бўлди.
