Бир муҳаббат тарихи

 

"Барселона" ва Аргентина терма жамоаси тарихидаги энг яхши тўпурар ҳисобланган Лео Мессининг унвонлари ва мукофотларининг саноғи йўқ. Машҳур футболчи ўз муваффақиятининг бир қисми сифатида рафиқаси Антонеллани билади. Сабаби у футболчини доимий қўллаб-қувватлаб келади.

 

Лионел Антонеллани беш ёшидан бери танийди. Қиз Мессининг энг яхши дўсти Лукас Скалиянинг амакиваччаси эди, Шунинг учун улар болаликда жуда кўп вақтини бирга ўтказишарди. 13 ёшида эса Месси ўз орзусига эришиш учун, она шаҳри Росариодан Барселонага кўчиб ўтади.

 

Шундан сўнг Месси ва Антонелла деярли мулоқот қилишмаган. Лео спорт карерасини қурди, йирик чемпионатларда қатнашди. Антонелла ўша пайтда университетда ўқишни бошлаган ва у ерда бир йигит билан танишади. Ҳатто уларнинг тўйи ҳам режалаштирилган эди. Аммо даҳшатли авария оқибатида бўлажак куёв вафот этади. Бундан хабар топган Месси дарҳол Антонелланинг олдига келади ва ўшандан кейин улар ҳеч қачон ажралишмаган.

 

Улар узоқ вақт давомида никоҳларини қонунийлаштирмайди. 2012 йил ноябрь ойида Лионел ва Антонелла Тиаго исмли ўғил кўришади. Уч йилдан сўнг уларнинг Матео исмли ўғли туғилади. 2017 йил октябрь ойига келибгина футболчи ўз севгилиси билан расман турмуш қуради. Дабдабали тўйда жаҳон футболи юлдузлари таклиф этилади.

 

Шу тариқа футболчи болаликдаги дўстига уйланди. У модель ҳам, актриса ҳам эмас, шоу-бизнесга умуман алоқаси бўлмаган, шон-шуҳратни орзу қилмайдиган оддий қиз эди.

 

Лео ўз шахсий ҳаёти ҳақида гапиришни ёқтирмайди. Унинг рафиқаси Антонелла эрининг барча ўйинларида қатнашади ва ўғилларини тез-тез ўйинларга олиб боради. Мессининг ўзи эса бундай қўллаб-қувватлаш у учун жуда муҳим эканини бир неча бор тан олган.

 

Яқинда футболчи Американинг "Интер Маями" клуби билан шартнома имзолади ва оиласи билан АҚШга кўчиб ўтди. Аввалига оила меҳмонхонада яшаган, бироқ тез орада Месси 11 миллион долларга ҳашаматли уй сотиб олди.

 

Лионелнинг тўнғич ўғли аллақачон отасининг изидан боряпти. 10 ёшли Тиаго маҳаллий футбол академиясида ўқийди ва ўзининг илк натижаларини кўрсатмоқда. Мессининг сўзларига кўра, ўғиллари характер жиҳатидан жуда фарқ қилади. Шунингдек, Месси рафиқасини мақташдан чарчамайди, чунки у бутун ҳаётини ўғилларини тарбиялашга бағишлаган, шифокорлик фаолиятини тўхтатган.