Хитой АҚШ билан муносабатларни яхшилаш тарафдори
Хитой ТИВ раҳбари икки давлат ўртасидаги алоқалар чуқурлаштирилиши кераклигини айтди.
Хитой ва Қўшма Штатлар ўз муносабатларини тезда барқарор йўлга қайтариш учун ҳаракат қилишлари керак. Бу ҳақда Хитой ташқи ишлар вазири Ван И АҚШ давлат котиби Энтони Блинкен билан учрашуви олдидан маълум қилди.
“Хитой ва АҚШ ўртасида келишмовчиликлар мавжуд, бироқ айни пайтда биз умумий манфаатларга эгамиз ҳамда умумий муаммоларга дуч келамиз, шунинг учун биз мулоқотга муҳтожмиз”, деди Ван И.
Унинг сўзларига кўра, Хитой-Америка мулоқоти нафақат жонлантирилиши, балки чуқурлашиши ва кенгайтирилиши керак. Бундай саъй-ҳаракатлар Хитой ва Қўшма Штатлар ўртасидаги муносабатларни барқарорлаштиришга ва уларни "соғлом ривожланиш йўлига" қайтаришга ёрдам беради.
Ван И 26-28 октябрь кунлари АҚШда бўлиб, Давлат котиби Энтони Блинкен ва миллий хавфсизлик бўйича маслаҳатчи Жейк Салливан билан музокаралар олиб бормоқда, бу эса келаси ой икки етакчи ўртасидаги учрашувга йўл очиши мумкин.
