Фақат ўзбеклар кўп гўшт емаяпти

 

Экспертлар сигарет қутиларига огоҳлантириш сўзлари ёзиш ва касал ички органлар расмини чоп этиш инсонларнинг чекиш ва никотиннинг зарарлиги ҳақидаги қарашларини қатъийлаштирганини айтмоқда. Энди улар худди шу услубдан гўшт истеъмолини камайтиришда фойдаланмоқчи. Европарламент ва ЕИга аъзо давлатлар ҳукуматлари гўшт маҳсулотлари истеъмолини чеклашни ёқлаб чиқмоқда.

 

Қатор тадқиқотлар кўрсатишича, бу саратоннинг айрим турлари ривожланишига сабаб бўлади. Бундан ташқари, гўшт саноати иқлимга салбий таъсирини ўтказмай қўймайди. Биринчи навбатда бу иссиқхона газлари кўринишида акс этади.

 

Буюк Британиянинг Дарем университети олимлари ўтказган тадқиқот натижалари сигарет қутиларидаги огоҳлантирувчи ёзувлар чекиш миқдорини камайтирганини кўрсатади. Улар огоҳлантирувчи ёзувлар гўшт истеъмолини ҳам камайтиришига умид қилмоқда.

 

Синов босқичлари ва хулосалари Appetite журналида чоп этилди.

 

Шундай қилиб, тадқиқот давомида олимлар турли гўшт маҳсулотлари қадоқларини синовдан ўтказди. Улар атроф-муҳит, инсон саломатлигига салбий таъсирлар, пандемия бошланиши мумкинлиги ҳақидаги огоҳлантирувчи график тасвирлар ва ёзувларни қамраб олди.

 

1001 кишидан иборат қатнашчилар 4 гуруҳга бўлинди. Уларга ошхонада сотиб олиш мумкин бўлган иссиқ таомлар кўрсатилган. Буларга гўштли паста, балиқли паста, сабзавотли ва вегетариан пастаси киритилган. Айрим маҳсулотлар қадоғида саломатлик, экологияга таъсир ва пандемиялар ҳақида огоҳлантириш тасвирланган. Қолган таомларга бундай ёзувлар қўйилмади.

 

Шундан сўнг эксперимент қатнашчиларидан бир неча саволга жавоб бериш сўралди. Улар ёзувлар қанчалик даражада ваҳима чақириши, тасвирлар қанчалик ҳақиқатга яқинлиги ва таом танловига қандай таъсир ўтказганини айтиб беришди.

 

Хулосага кўра, бундай ёрлиқлар мазкур таомни танлаш ихтиёрини пасайтирган.

 

Ҳисоб-китобларга кўра, юқоридаги сингари ёрлиқлар туфайли гўшт истеъмолчилари 7-10 фоизга камайган. Қатнашчиларга энг кўп иқлим ўзгариши ҳақидаги огоҳлантиришлар таъсир қилган.

 

YouGov ўтказган сўровномага кўра, Британия аҳолисининг 72 фоизи ўзини гўштхўрлардан эканини айтган. Миллий озиқ-овқат стратегияси доирасида бу кўрсаткични 2030 йилгача 30 фоизга пасайтириш мақсад қилинган.