Германия меҳмоннавозликни йиғиштирмоқчи

 

2015-2016 йилларда Европа давлатларини миграцион инқироз қамраб олган пайтда Германия Ангела Меркел раҳбарлигида чет элликларга дарвозасини очганди. "Меҳмоннавозлик маданияти" (Виллкомменскултур) дастури доирасида мамлакат 1,2 млн бошпана сўровчи қочқинни қабул қилган.

 

Бугун Европада ноқонуний миграция даражаси яна ўсмоқда. Германия эса мигрантлар интеграцияси дастурини қайта кўриб чиқмоқчи.

 

"Биз Германияга ноқонуний миграцияни чеклаймиз. Бу ерга жуда кўп одам келяпти", - деди амалдаги канцлер Олаф Шолс.

 

Унинг сўзларига кўра, Германия мамлакатда қолишга асоси бўлмаган мигрантларни оммавий қайтариб юборишни бошлаши керак.

 

Канцлернинг шу сўзларидан бир неча кун ўтиб федерал ҳукумат ноқонуний мигрантларни депортация қилиш жараёнини тезлаштириш ҳақидаги қонун лойиҳасини маъқуллади. Бу эса Германия учун катта ўзгариш вақти етганини билдиради.

 

Шу ҳафта бошида Нигерияга қилган 3 кунлик сафари чоғида Шолс Африканинг бу давлати президенти Бола Тинубудан миграция масаласида ёрдам сўради. У йил бошида Италия бош вазири Жоржа Мелонининг Тунис билан тузган шартномасидан андоза олмоқчи.

 

Келишувга кўра, Нигерия миграция марказларини кенгайтириб, Германиядан депортация қилинганларни қабул қилиши керак.

 

Бу ташаббус Олаф Шолснинг иккита ҳудудий сайловда ҳам уч партияли коалиция мағлубиятга учрагач, қатъий миграцион сиёсатга ўтганини яққол кўрсатади. Иккала сайловда ҳам консерваторлар ғалаба қозонган. Ўта ўнгчилар эса рейтинглардаги кўрсаткичларини анча яхшилаб олган.

 

Шолс эса мамлакатда бошпана сўраётганлар сони ошгани туфайли босим остида қолиб кетмоқда. Давлат ичида норозилик кучайган, аҳоли ҳукумат қочқинлар оқимига қарши айтарли иш қилмаётганидан норози.

 

Ўтказилган сўровнома натижаларига кўра, германияликларнинг 44фоизи иммиграция масаласини мамлакатнинг энг муҳим сиёсий масаласи деб билади ва сиёсатчилар унга биринчи навбатда эътибор қаратишини хоҳлайди.

 

Аммо 2015 йилда Европа давлатларининг катта қисмидан фарқли равишда Германия мигрантларга эшик очганида фуқаролар уларни қучоқ очиб кутиб олган эди.

 

Таҳлилчиларнинг фикрича, ўтган йиллар ичида сиёсат ўзгарган бўлсада, одамлар ёрдамга муҳтожларни қабул қилишга қарши эмас. Аммо мигрантлар сонини камайтириш керак, дейдиганлар ҳам кўп.