Бугун Тошкентда WBC ташкилотининг 61-конвенцияси ўз ишини бошлайди

 

Бутунжаҳон бокс иттифоқининг (WBC) бу йилги конвенциясига Тошкент мезбонлик қилмоқда. Бу ҳақда Ўзбекистон профессионал бокс федерацияси матбуот хизмати маълум қилди.

 

Йил якунланиб борар экан, барча соҳа ва йўналишларда бўлгани каби WBC ташкилоти ҳам ўзининг йиллик фаолияти сарҳисоби ҳамда режаларини муҳокама қилади. Ўтган йили ташкилотнинг 60-конвенцияси Мексикада ўтказилган ва айнан ўша тадбирда навбатдаги конвенция мезбонлиги Тошкент шаҳрига ишониб топширилганди.

 

Йилнинг энг муҳим бокс тадбирида қатнашиш учун Ўзбекистонга юздан зиёд мамлакатдан делегатлар келди. Ўзбекистонда WBC ташкил этилганлигининг 60 йиллиги ҳам нишонланади. Шу кунгача конвенция Мексикадан ташқари АҚШ, Европа мамлакатларида ташкил этилган. МДҲ мамлакатлари орасида Боку (Озарбайжон) ва Москва (Россия) шаҳарлари ҳам ушбу тадбирга мезбонлик қилган. Осиё давлатлари орасида Таиланд, Япония ҳам WBC конвенциясини қабул қилган. Марказий Осиё давлатлари орасида Ўзбекистон биринчи бор бу тадбирни ўтказмоқда.

 

WBC 61-конвенцияси кун тартибидан таълим, допинг, ҳакамлик, халқаро муносабатлар, бокс қоидалари, рейтинглар, чемпионлик камарлари, хайрия ва жамоат ташаббуслари каби бир нечта масалалар бўйича йиғишлар ўтказилиши ўрин олган. Бугун соат 10:00да пойтахтдаги "Hilton" меҳмонхонасида конвенция ўз ишини бошлайди. Тадбир якунланиши билан оммавий ахборот воситалари ходимлари учун матбуот анжумани ҳам ўтказилади.

 

Шунингдек, Ўзбекистонга келган меҳмонлар қадим ва ҳамиша навқирон Самарқанд шаҳрида ҳам бўлишади. Юлдузли меҳмонлар ёш боксчиларга ўз маҳорат сабоқларини улашишади. 17 ноябрь куни муҳташам "Ҳумо Арена"да катта профессионал бокс кечаси бўлиб ўтади. Ушбу турнир Ўзбекистоннинг LIFТ промоутерлик компанияси томонидан ташкил этиляпти. Оқшомнинг марказий жанги супероғир вазнда ўтказилиб, унда Баҳодир Жалолов ЖАР вакили Крис Томпсонга қарши рингга кўтарилади.