Эвандер Холифилддан Отабек Умаровгача: бокс афсоналари Тошкентда жам бўлди — фотожамланма
Пойтахтимиз Бутунжаҳон бокс иттифоқи (WBC)нинг 61-конвенциясига мезбонлик қилмоқда.
Бугун курайи заминимизнинг юздан зиёд давлати вакиллари, дунёга машҳур боксчилар, таниқли промоутерлар, бир сўз билан айтганда жаҳон профессионал бокс оммаси қатнашаётган Конвенциянинг тантанали очилиш маросими бўлиб ўтди.
Унда Ўзбекистон Республикаси Бош вазири ўринбосари Ачилбой Раматов, Осиё Олимпия кенгаши вице-президенти Отабек Умаров, Ёшлар сиёсати ва спорт вазири Адҳам Икрамов, Ўзбекистон касаба уюшмалари федерацияси ҳамда мамлакат профессионал бокс федерацияси васийлик кенгаши раиси Қудратилла Рафиқов, федерация раисининг биринчи ўринбосари Ғофур Раҳимов, WBC президенти Маурисио Сулейман ва бошқа расмийлар иштирок этди. Ачилбай Раматов тадбир аввалида сўз олиб, мамлакатимизда Президентимиз томонидан соғлом турмуш тарзи, хусусан, спортга қаратилаётган улкан эътибор хусусида тўхталди. Боксчиларимизнинг халқаро майдонда қайд этаётган ютуқларини алоҳида эътироф этди ва тадбирни расман очиқ деб эълон қилди. Ўз ўрнида, Маурисио Сулейман мамлакатимиз ушбу йирик спорт тадбирига юқори савияда ҳозирлик кўргани, профессионал боксчиларимизнинг жаҳон рингларида айтишга арзигулик ғалабаларга эришаётгани ҳақида гапирди.
Очилиш маросимида Ўзбекистон профессионал бокс федерацияси томонидан ўтган давр мобайнида амалга оширилган кенг кўламли ишлар сарҳисобига бағишланган видеолавҳа намойиш этилди. Шунингдек, WBC тарихига оид ҳужжатли фильм кўпчиликнинг диққат марказида бўлди. Ғофур Раҳимов WBC олий ижроия қўмитаси аъзолигига қабул қилинди.
Тадбирда WBC президенти А.Раматов ва Ғ.Раҳимовга узоқ йиллик ҳамкорлик ҳамда мазкур конвенцияни юқори савияда ташкил этишдаги ёрдами учун ташкилотнинг эсдалик совғаларини тақдим қилди. Шунингдек, ўзбек бокси юлдузларига ҳам махсус медаллар топширилди.
