Афсонавий Муҳаммадқодир Абдуллаев 50 ёшда!
У 2000 йил Сиднейда ўтган Олимпия ўйинларида ғолиб чиқиб, Ўзбекистон ҳисобига ёзги Олимпия ўйинларидаги илк олтин медални тақдим этган.
Бугун Сидней-2000 Олимпиадаси чемпиони, Ўзбекистонга олимпия ўйинларидаги илк олтин медални тақдим этган Муҳаммадқодир Абдуллаев ўз таваллуд айёмини нишонламоқда. Боксимиз афсонаси қутлуғ 50 ёшга тўлди.
Муҳаммадқодир Абдуллаев 1973 йил 15 ноябрь куни Андижонда дунёга келган. Бокс бўйича Осиё ва жаҳон чемпиони, Осиё ўйинлари ғолиби. 2000 йил Сиднейда ўтган Олимпия ўйинларида ғолиб чиқиб, Мустақил Ўзбекистон ҳисобига ёзги Олимпия ўйинларидаги илк олтин медални тақдим этган.
Бугунги кун қаҳрамони профессионал боксда ҳам ёрқин иштирок этганини таъкидлаш жоиз. Муҳаммадқодир Абдуллаев Нью-Йоркдаги муҳташам “Мэдисон Сквер Гарден” аренада афсонавий Мигель Коттога қарши чемпионлик жангида рингга кўтарилган.
Абдуллаевнинг эришган ютуқлари ҳукуматимиз томонидан "Ўзбекистон Республикасида хизмат кўрсатган спортчи", "Ўзбекистон ифтихори" фахрий унвонлари, "Эл-юрт ҳурмати" ордени ҳамда "Шуҳрат" медали билан тақдирланган.
2019 йилда Президент ташаббуси билан Андижон вилояти Бўз туманидаги 6-умумтаълим мактабида Муҳаммадқодир Абдуллаев бокс мактаби ташкил этилди.
