Тошкентда Jah Khalib концерти куни тартибсизлик юз берди
Ҳолат юзасидан расмий маълумот берилди.
Ижтимоий тармоқда Тошкент шаҳрдаги “Ҳумо арена” саройида 25 ноябрь куни тартибсизлик юзага келгани акс этган видеолар тарқалди. Тармоқдаги хабарларда машҳур хонанда Jah Khalib концертига одамлар чиптаси бўлса ҳам киролмагани, шунинг учун одамлар тўплангани айтилади.
Ҳолат юзасидан Миллий гвардия Тошкент шаҳри бўйича бошқармаси маълумот берди.
Қайд этилишича, ушбу концертга ташриф буюрган фуқаролар ўртасида “Ҳумо арена” саройига кириш жойлари олдида тартибсизлик ҳолатлари юз берган. Шу ерда хизмат олиб бораётган Миллий гвардия ходимлари томонидан жамоат тартибини бузганликда гумонланган фуқаролар воқеа жойидан хавфсиз ҳудудга олиб чиқилиб, юз бериши мумкин бўлган салбий ҳолатларнинг олди олинган.
Тартиббузарликка доир ҳолат юзасидан суриштирув ва ўрганиш ишлари олиб борилмоқда. Ҳозирда барча фуқаролар воқеа жойидан тарқатилган. Тан жароҳати олганлар йўқ.
