Шавкат Мирзиёев ва Қосим-Жомарт Тоқаев телефон орқали мулоқот қилди
Ўзбекистон раҳбари Тоқаевни Қозоғистон тарихида илк бор бир палатали Қурултойга сайлов муваффақиятли ўтказилгани билан табриклади.
Ўзбекистон Президенти Шавкат Мирзиёев Қозоғистон Президенти Қосим-Жомарт Тоқаев билан телефон орқали мулоқот қилди.
Суҳбат аввалида Шавкат Мирзиёев Қосим-Жомарт Тоқаевни Қозоғистон тарихида илк бор бир палатали Қурултойга сайлов муваффақиятли ўтказилгани билан самимий табриклади.
Давлат раҳбари янги Қурултой Қозоғистонда амалга оширилаётган изчил ислоҳотларни янада илгари суриш, кенг кўламли ўзгаришларни қонунчилик жиҳатидан самарали таъминлаш ҳамда мамлакатнинг барқарор ривожланишига янги суръат бағишлашига ишонч билдирди.
Мулоқот давомида Ўзбекистон ва Қозоғистон ўртасидаги стратегик шериклик ва иттифоқчилик муносабатлари жадал ривожланаётгани мамнуният билан қайд этилди.
Шунингдек, ўзаро савдо ҳажмини ошириш, саноат кооперациясини кенгайтириш, қўшма инвестиция лойиҳаларини амалга ошириш, транспорт-логистика алоқаларини ривожлантириш ҳамда икки мамлакат ҳудудлари ўртасидаги ишбилармонлик алоқаларини фаоллаштириш масалалари муҳокама қилинди.
Етакчилар минтақавий ва халқаро кун тартибидаги долзарб масалалар юзасидан ҳам фикр алмашдилар.
