Самарқандда жанжални тугатишга борган инспектор калтакланди
Бу ҳам етмагандек, унинг машинасига шикаст етказишган.
Самарқанд шаҳрида жанжалга чек қўйишга борган профилактика инспекторига қаршилик кўрсатган фуқароларга нисбатан жиноят иши қўзғатилиб, қамоққа олинди. Бу ҳақда Самарқанд вилояти ИИБ ахборот хизмати раҳбари Жаҳонгир Сагдуллаев хабар қилди.
Қайд этилишича, 20 ноябрь соат 19:30 да Самарқанд шаҳар «Бунёд» маҳалласида яшовчи фуқаро M.R. «102» операторига қўнғироқ қилиб, яшаш хонадонида жанжал бўлаётганлигини маълум қилиб, профилактика инспекторини юборишни сўраган.
Шунга кўра, Самарқанд шаҳар бўйича ИИО ФМБ 6-сон ИИБ профилактика инспектори лейтенант А.Тошпўлотов фуқаронинг яшаш хонадонига борганида, муқаддам Ўзбекистон Республикаси ЖКнинг бир неча моддалари билан судланган фуқаролар M.R., унинг опаси, турмуш ўртоғи ва укаси ўзаро жанжаллашаётганлигини кўриб, уларни ажратиб, жанжалга чек қўйиш жараёнида, фуқаролар профилактика инспекторига фаол қаршилик кўрсатиб, уни турли жойларига уриб тан жароҳати етказиб, профилактика инспекторига тегишли бўлган транспорт воситасининг олд ойнасини синдириб моддий зарар етказишган.
Воқеа жойи тегишли тартибда кўздан кечирилиб, фуқароларга нисбатан Ўзбекистон Республикаси Жиноят кодексининг 219-моддаси 2-қисми билан жиноят иши қўзғатилиб, процессуал тартибда қамоққа олинган.
