"Месси ёки Роналду?"
Аббос кимга мухлислик қилади?
ССКА ярим ҳимоячиси Аббосбек Файзуллаев “Интер Маями” ҳужумчиси Лионел Месси ёки Саудиянинг "Ал-Наср" клуби ҳужумчиси Криштиану Роналдудан қайси бирига мухлислик қилиши айтди.
“Месси ёки Роналду? Албатта, Месси. Нега? Ўйин услуби ёқади", - деди Файзуллаев.
Эслатиб ўтамиз, октябрь ойи охирида Лионел Месси саккизинчи "Олтин тўп"ни қўлга киритди. Парижда йил якунлари бўйича дунёнинг энг яхши футболчиси учун мукофот топширилди. “Интер Маями”нинг аргентиналик ҳужумчиси Аргентина терма жамоасининг Қатардаги жаҳон чемпионатидаги ғалабаси эвазига бундай шарафга сазовор бўлди. Криштиану Роналду ўз фаолияти давомида беш марта “Олтин тўп” совринини қўлга киритган бўлиб, охирги марта бу шарафга 2017 йилда сазовор бўлган эди.
Маълумот учун, Файзуллаев жорий мавсумда ССКА сафида 11 та ўйин ўтказиб, 2 та гол урди ва 4 та голли узатмани амалга оширди.
