Қумқўрғон ҳокимига ҳадя қилинган Equinox эгасига қайтарилди
Коррупцияга қарши курашиш агентлиги ҳолат юзасидан ўрганиш ўтказди.
Қумқўрғон тумани ҳокими Анвар Нормаматов тадбиркор совға қилган автомобилни ҳокимлик балансига олиш тўғрисидаги фармойишини бекор қилди.
Аксилкоррупция агентлигига кўра, ушбу ҳолатда манфаатлар тўқнашуви аниқланмаган, лекин ҳокимликка совға қилинган автомобиль нархи ҳукумат қарорида белгиланган меъёрлардан юқори.
Шу йил 17 октябр куни «Qumtex Invest» МЧЖ раҳбари Урал Бегимқулов Сурхондарё вилояти Қумқўрғон тумани ҳокимлигига 400 миллион сўмдан қиммат турувчи автомобил совға қилган эди.
Жамоатчилик норозилигидан сўнг Коррупцияга қарши курашиш агентлиги ҳолат юзасидан ўрганиш ўтказиб, ҳокимликка коррупцияни келтириб чиқарувчи сабаб ва шарт-шароитларни бартараф этиш чораларини кўриш ҳақида тақдимнома киритган.
Агентлик директори Акмал Бурҳоновга кўра, ушбу ҳолатда манфаатлар тўқнашуви аниқланмаган. Лекин ҳокимликка совға қилинган автомобил нархи ҳукумат қарорида белгиланган меъёрлардан юқори.
Шу сабабли Сурхондарё вилояти Қумқўрғон тумани ҳокими Анвар Нормаматов тақдимномага асосан, автотранспорт воситасини ҳокимлик балансига ўтказиш ҳақидаги фармойишини бекор қилди.
Октябрь ойида ҳокимликка қимматбаҳо автомобил совға қилган шахс – Урал Халмурзаевич Бегимқулов бўлиб, у «Qumtex Invest» МЧЖнинг раҳбари ҳисобланади. Яшаш учун мўлжалланмаган биноларни қуриш билан шуғулланадиган бу корхона таъсисчилари турли хил кластер ва текстилларга чатишиб кетган.
Қумқўрғон тумани ҳокимлиги ижтимоий тармоқлардаги муҳокамалардан сўнг фармойишни жамоатчиликдан яшириб қўйган эди.
