Фарғонада майнинг ферма аниқланди
У давлатга салкам 3 млрд зарар етказган.
Фарғона вилоятида 2,8 млрд сўмликдан зиёд зарар келтирган майнинг фермаси фаолияти тўхтатилди. Бу ҳақда Энергетика вазирлиги хабар берди.
«Ўзенергоинспекция» томонидан ҳуқуқни муҳофаза қилувчи органлар ҳамда “Фарғона ҳудудий электр тармоқлари корхонаси” АЖ мутахассислари билан ҳамкорликда Фарғона вилоятида электр энергиясидан ноқонуний фойдаланишларнинг олдини олишга қаратилган рейд тадбирлари ўтказилмоқда.
Хусусан, Учкўприк туманининг Боғибўстон маҳалласида фаолият кўрсатувчи МЧЖда фуқаро M.A. томонидан ўзбошимчалик билан электр ҳисоблагичга ташқи таъсир кўрсатилиб, майнинг қурилмаларини тўғридан-тўғри электр тармоғига улаб, ноқонуний равишда фойдаланиб келинаётганлиги аниқланди.
Дастлабки қайта ҳисоб-китобларга кўра, M.A. томонидан тизимга 2,8 млрд сўмликдан зиёд зарар етказилган.
Қоидабузар истеъмолчига нисбатан белгиланган тартибда чора кўриш учун тегишли ҳужжатлар ҳуқуқни муҳофаза этувчи органларга тақдим қилинди.
