Саида Мирзиёева Хитой парламенти раиси билан учрашди
Учрашувда транспорт, савдо, таълим ва маданият соҳаларидаги қўшма лойиҳаларни амалга ошириш масалалари кўриб чиқилди.
Ўзбекистон Президенти Администрацияси раҳбари Саида Мирзиёева Хитой Коммунистик партияси Марказий Қўмитаси Сиёсий бюроси Доимий қўмитаси аъзоси, Бутунхитой халқ вакиллари кенгаши Доимий қўмитаси раиси Чжао Летсзи билан учрашди.
Мулоқотда Ўзбекистон ва Хитой ўртасидаги стратегик муносабатларнинг изчил ривожланиши, шунингдек, парламентлараро алоқаларнинг янги босқичга кўтарилаётгани муҳокама қилинди.
Суҳбат давомида икки давлат раҳбарларининг изчил ва самарали мулоқоти натижасида сўнгги йилларда Ўзбекистон-Хитой муносабатлари мустаҳкамланиб, ҳамкорликнинг янги йўналишлари билан бойиб бораётгани қайд этилди.
Саида Мирзиёева Хитой томонининг Ўзбекистонни қўллаб-қувватлаши, хусусан, транспорт, савдо, таълим ва маданият соҳаларидаги аниқ лойиҳаларни биргаликда амалга оширишга қаратилган ташаббусларини юқори баҳолади.
Учрашувда икки томонлама ҳамкорликни янада кенгайтириш, мавжуд келишувларни изчил ҳаётга татбиқ этиш ҳамда истиқболдаги муштарак режаларни амалга ошириш масалаларига алоҳида эътибор қаратилди.
Саида Мирзиёева Чжао Летсзига очиқ ва мазмунли мулоқот учун миннатдорлик билдирди.
