Шавкат Мирзиёев ўзбек халқига миннатдорлик билдирди

 

Президент Шавкат Мирзиёев Ўзбекистон мустақиллигининг 35 йиллиги муносабати билан давлат мукофотларини топшириш маросимида сўзлаган нутқида мамлакат тараққиётида турли соҳа вакилларининг ҳиссаси ва мустақиллик йилларида амалга оширилган кенг кўламли ислоҳотлар натижаларига тўхталди.

 

Давлати раҳбари мустақилликнинг куч-қудрати маданият, санъат ва спортни ривожлантириш йўлида хизмат қилаётган инсонларнинг маҳорати, шунингдек, ислоҳотлар ижросини ҳар бир маҳалла ва хонадонга етказаётган давлат хизматчиларининг меҳнатида ҳам намоён бўлаётганини таъкидлади.

 

Жойларда аҳолини эзгу мақсадлар йўлида бирлаштираётган нуронийлар ва маҳалла фаоллари, халқ осойишталиги ҳамда Ватан тинчлигини таъминлаётган ҳарбийлар ва ҳуқуқ-тартибот ходимларининг жасорати алоҳида қайд этилди.

 

— Бир сўз билан айтганда, Янги Ўзбекистоннинг энг катта натижаси — бу ўзгарган инсон, ўз кучига ишонган фуқаро, эртанги кунга дахлдорлигини ҳис қилаётган жамиятдир! — деди Президент.

 

Давлатимиз раҳбари фидойи ва бунёдкор ватандошларга, мустақилликнинг энг катта кучи ва таянчи бўлган бутун халқимизга чуқур миннатдорчилик билдирди.

 

Инсон қадри улуғланган, адолат ва тараққиётга таянган Янги Ўзбекистонни барпо этиш йўлидан халқ билан биргаликда дадил борилаётгани таъкидланди.

 

Сўнгги ўн йилда халқ билан ҳамжиҳатликда амалга оширилган ислоҳотлар натижасида мамлакат иқтисодиёти барқарор ва юқори суръатларда ўсиб бораётгани қайд этилди.

 

Хусусан, ўтган даврда Ўзбекистонга 160 миллиард доллардан ортиқ хорижий инвестиция киритилди. Иқтисодиёт ҳажми 2,5 баробардан зиёд ошди. Жорий йилда ялпи ички маҳсулот ҳажми 180 миллиард доллардан ошиши кутилмоқда.

 

Саноат, сервис ва қишлоқ хўжалиги соҳаларида 5 миллион 700 мингта доимий иш ўрни яратилди.

 

Таълим ва тиббиёт инфратузилмасини ривожлантириш доирасида давлат ва хусусий сектор иштирокида 1,5 миллион ўринли замонавий мактаблар, 342 минг ўринли боғчалар ҳамда 62 минг ўринли шифохоналар фойдаланишга топширилди.

 

Аҳолининг транспорт ва коммунал шароитларини яхшилаш мақсадида 83 минг километр умумий фойдаланишдаги ички йўллар қурилди ва таъмирланди.

 

8 миллион аҳоли яшайдиган хонадонларга илк бор марказлашган ичимлик суви етказилди, яна 11,5 миллион аҳолининг сув таъминоти яхшиланди.

 

Уй-жой соҳасида ҳам кенг кўламли ишлар амалга оширилди. Ўтган ўн йил давомида 650 минг оила янги замонавий уй-жойга эга бўлди.

 

— Халқимизда “Уйли бўлиш — ватанли бўлиш” деган нақл бор. Шу маънода, камида 2,5 миллион аҳоли ватанли бўлди, — деди Шавкат Мирзиёев.