2023 йилда Тошкент вилояти божхоначилари томонидан 167 килограмм гиёҳвандлик воситалари ушлаб қолинди
Вилоят божхона бошқармаси матбуот хизмати йил якуни бўйича соҳада қилинган ишлар юзасидан Zamon.uz'га маълумот берди.
Тизимда амалга оширилган ислоҳотлар натижасида йил якунига қадар барча бўлинма, гуруҳ ва божхона постларида фуқароларга замон талаблари даражасида хизмат кўрсатиш йўлга қўйилди.
"2023 йил давомида амалга оширилган ишлар кўламига назар ташлар эканмиз, барча жараёнлар тадбиркорлик фаолиятини қўллаб-қувватлаш, уларга янада қулай шароитлар яратиш, аҳоли вакилларига божхона назорати ва расмийлаштирув вақтини оптимал даражада тежаш ҳамда божхона терминалларидаги тирбандликларни олдини олишга йўналтирилганлигига гувоҳ бўламиз", — дейди Тошкент вилояти божхона бошқармаси бошлиғи Олимжон Хожиматов.
2023 йилда Тошкент вилоятининг ташқи савдо айланмаси 7 миллиард долларига тенг бўлди. Экспорт ҳажми 2 миллиард импорт салмоғи эса 5 миллиард долларини ташкил этди. Хорижий давлатлардан тегишли хом ашё, бутловчи қисмлар, технологиялар кириб келишида ҳамда юртимизда ишлаб чиқарилган турли хил саноат маҳсулотлари, деҳқон ва фермерларимизнинг пешона тери эвазига етиштирилган сархил қишлоқ хўжалиги маҳсулотларини четга экспорт қилишда тегишли ҳужжатларни тезкор расмийлаштириш, юкларни синчковлик билан назоратдан ўтказишда божхона постларидаги навбатчилик қисмлари куну тун меҳнат қилди.
Вилоятнинг қўшни давлатлар билан чегарадош ҳудудлари орқали контрабанда ашёларини юртимизга ноқонуний кириб келишини олдини олиш борасида тизимли тадбирлар амалга оширилди. Натижада, 2023 йил давомида Божхона бошқармасининг тезкор тузулмалари томонидан гиёҳвандлик воситаларининг яширин айланмасига бир неча бор чек қўйилди. Тезкор тадбирлар давомида 167 килограмм гиёҳванд воситаларининг ноқонуний олиб ўтилиши фош этилди. Шунингдек, тамаки маҳсулотларининг ноқонуний айланмасига чек қўйиш, акциз маркасиз ёхуд бошқа давлатларнинг акциз ёрлиғига эга бўлган тамаки маҳсулотларининг олиб кирилишини олдини олиш божхона органлари зиммасига юкланган муҳим вазифалардан бири ҳисобланади ва шу йилнинг ўзида қиймати салкам 6 миллиард сўм қарийб 332 минг қути акциз маркалари бўлмаган тамаки маҳсулотлари айланмасига ҳам барҳам берилди.
Аҳоли саломатлиги муҳофазасини таъминлаш мақсадида эса ходимларимиз томонидан 900 мингдан зиёд сифати кафолатланмаган дори воситаларини ноқонуний айланмаси олди олинди.
Мамлакатимизда тадбиркорлик субъектларига қаратилаётган эътибор яратилаётган қулайликлар иқтисодиётимизнинг ривожланишига йўл очмоқда.
Божхона органлари томонидан тадбиркорлик субъектларининг ташқи иқтисодий фаолиятни доимий қўллаб-қувватлаш, улар дуч келаётган мавжуд тўсиқларни бартараф этиш бўйича тизимли чора-тадбирлар амалга оширилмоқда.
Божхона ҳудудида қайта ишлаш" божхона режимига расмийлаштириш тартиби бўйича Ўзбекистон Республикаси Президентининг 2022 йил 25 апрелдаги Фармони билан хориждан импорт қилинадиган хомашё ва материалларни қайта ишлаш истагида бўлган тадбиркорлик субъектлари ушбу божхона режимидан фойдаланилганда, божхона тўловлари ундирилмаслиги ва иқтисодий сиёсат чоралари қўлланилмаслиги каби афзалликлари билан кенг имкониятлар очиб берилмоқда.
Рақамларга кўра, жорий йилнинг ўтган давр мобайнида Тошкент вилояти ҳудудидаги 50 дан ортиқ тадбиркорлик субъектлари томонидан хориждан олиб келинган 397,1 минг тонна, қиймати қарийб 114,5 миллион долларга тенг бўлган хом-ашёлар “божхона ҳудудида қайта ишлаш” божхона режимига жойлаштирилган. Қайта ишлангандан сўнг хорижга юборилган тайёр маҳсулотлар қиймати салкам 263 миллион долларини ташкил этган.
Шунингдек, 2023 йилда Гендер тенгликни таъминлаш борасидаги ишлар натижадорлиги ҳам салмоқли бўлди. Вилоят божхона бошқармасида хизмат қилаётган 656 ходимлардан 78 нафарини аёллар ташкил этади. Эркак ходимлар билан тенг ҳуқуқли ва елкама елка хизмат олиб боради. Жорий йил давомида юрт тинчлиги, фаровонлигини асрашда, иқтисодий сарҳадлар хавфсизлигини таъминлаш борасида юқори натижаларга эришган 15% аёллар юқори унвонлар берилди.
