Пойтахтда яроқсиз дори сотаётган фирма аниқланди
Фармацевтика мутахассислари текширувига фуқаро мурожаати сабаб бўлгани айтилмоқда.
Фармацевтика хавфсизлиги маркази хабарига кўра, Фармацевтика фаолиятини лицензиялаш бошқармаси мутахассислари томонидан фуқаро мурожаати асосида Тошкент шаҳри, Шайхонтоҳур тумани, Фаробий кўчаси, 28А-уй манзилида жойлашган “Муяссар Мед” МЧЖга тегишли дорихонада текширув ўтказилган.
Таҳлиллар натижасига кўра, 69 турдаги дори воситаси тиббиёт амалиётида қўлланилишига рухсат этилган дори воситалари, тиббий буюмлар ва тиббий техника Давлат рўйхатидан ўтмаганлиги ҳамда 71 турдаги дори воситасига мувофиқлик сертификати мавжуд эмаслиги аниқланган.
Юқоридаги ҳолатлар бўйича, “Муяссар Мед” МЧЖга дори воситалари ва тиббий буюмларни чакана реализация қилиш учун, 2019 йил 9 февралда берилган №480-сонли лицензияни бекор қилиш тўғрисида Фармацевтика маҳсулотлари хавфсизлиги марказининг Тошкент туманлараро иқтисодий судига киритган даъво аризаси суднинг тегишли ҳал қилув қарори билан қаноатлантирилди. Ҳамда “Муяссар Мед” МЧЖга берилган лицензия бекор қилинди.
Маълумот ўрнида, "Лицензиялаш, рухсат бериш ва хабардор қилиш тартиб-таомиллари тўғрисида"ги Қонунга киритилган қўшимча ва ўзгартиришларга мувофиқ, 2024-йил 17-февралдан бошлаб, лицензиат ёки рухсат этиш хусусиятига эга ҳужжатни олган шахс томонидан лицензия ёки рухсат бериш талаблари ва шартлари мунтазам равишда (1 йил давомида икки ва ундан ортиқ марта) бузилганда унга 1 йил давомида қайтадан лицензия берилмайди.
