Тошкентда иссиқ сув истеъмолчиларга лойқа қора зарралар билан етказиб берилди
Ҳолатга шаҳар ҳокимияти муносабат билдирди.
Тошкентда Ижтимоий тармоқлар орқали истеъмолчилардан иссиқ сувда лойқалик билан қора зарралар мавжудлиги юзасидан шикоятлар келиб туша бошлади. Бунга шаҳар ҳокимлиги расмий муносабат билдирди.
Қайд этилишича, лаборатория ходимлари томонидан зудлик билан 1-ИМ қозонхонасидан истеъмолчиларга етказиб берилаётган иссиқ сув таҳлили ўтказилган.
Аниқланишича, 2024 йил 2 январдан 3 январга ўтар кечаси 1-ИМ қозонхонасида сувни тозалаш фильтридан сульфатланган кўмир ажралиб чиққан. «ВEТ» МЧЖ ХК иситиш тармоқларига қозонхонадан сульфатланган кўмир тушиши натижасида Мирзо Улуғбек ва Яшнобод туманларидаги истеъмолчиларнинг иссиқ сувларида қора фракциялар (сулфокўмир) пайдо бўлган. Иссиқ сув параметрлари, ранг ва лойқаликдан ташқари, нормал ҳолатда.
Сулфокўмир сувни фильтрлашда ишлатилади ва истеъмолчилар учун хавф туғдирмайди. 1-ИМ қозонхона ходимлари томонидан иссиқлик тармоқларида сульфатланган кўмир оқими бартараф этилган. Айни пайтда вазият қозонхона ва техник ходимлари томонидан назоратга олинган.
