Сариосиё – Тошкент йўналишида илк парвоз амалга оширилди
Унда экспертлардан иборат ишчи гуруҳ парвоз қилган.
2024 йил 5 январь куни «Let L-410» ҳаво кемасида Тошкент – Термиз, Термиз – Сариосиё, Сариосиё – Тошкент йўналишида илк синов парвозларини амалга оширди.
Мазкур рейсда Транспорт вазирлиги, Фуқаро авиацияси агентлиги, “Ўзбекистон ҳаво йўллари” АЖ ва “Ўзбекистон аэропортлари” АЖнинг тегишли мутахассис ва экспертларидан иборат ишчи гуруҳ парвоз қилди, деб ёзади Транспорт вазирлиги ахборот хизмати.
Ишчи гуруҳ томонидан Сариосиё аэродромидан фуқаро авиацияси парвозларида фойдаланиш талаблари, мавжуд инфратузилма, Сариосиё аэродромининг «АТР-72» ҳаво кемаларини қабул қилиш имкониятлари ўрганилди.
Шунингдек, фуқаро авиацияси халқаро нормаларига мувофиқ йўловчи терминалини барпо этиш ва зарурий инфратузилмани яратиш бўйича вазифалар белгиланди.
Белгиланган вазифалар амалга оширилганидан сўнг Туризм қўмитаси ҳамда Сурхондарё вилоят ҳокимлиги томонидан ҳудудга жалб этилган туристларни ва маҳаллий аҳолини авиамобиллигини таъминлаш бўйича «ATR-72», «Let L-410» ва ундан кичик турдаги ҳаво кемалари орқали авиақатновлар йўлга қўйилади.
