Исроил Ғазога ёрдам олиб кетаётган БМТ машинасини ўққа тутди
Бу ҳақда UNRWAнинг Фаластин анклавидаги операциялар бўйича директори Х ижтимоий тармоғида маълум қилди.
Исроил ҳарбий денгиз кучлари Бирлашган Миллатлар Ташкилотининг Яқин Шарқдаги фаластинлик қочқинларга ёрдам кўрсатиш ва иш билан шуғулланувчи агентлигининг (UNRWA) гуманитар озиқ-овқат карвонига қарата ўт очди. Бу ҳақда UNRWAнинг Фаластин анклавидаги операциялар бўйича директори Томас Уайт Х ижтимоий тармоғида маълум қилди.
“Бугун эрталаб озиқ-овқат карвони Ғазо сектори шимолига жўнаб кетмоқчи бўлган пайтда Исроил ҳарбий-денгиз кучлари томонидан ўққа тутилди, хайриятки, ҳеч ким жабрланмади”, — деди Уайт.
UNRWA шунингдек, анклавнинг барча қисмларига хавфсиз кириш муҳимлигини айтди.
"Биз отилган ўқлар остида гуманитар ёрдам етказа олмаймиз. Хавфсиз ва барқарор инсонпарварлик ёрдами зудлик билан ҳамма жойда, жумладан, Ғазо шимолида ҳам зарур", — дейилади агентлик баёнотида.
