Тошкентда телеканал раҳбарият ходими ўз ходимасига тегажоғлик қилгани учун қамалди
Телеканал МТРК таркибида бўлган.
Жиноят ишлари бўйича Шайхонтоҳур туман суди судьяси A.Mирзахановнинг қарорида келтирилишича, ТВда бош муҳаррир ўринбосари сифатида ишлаб келган Ш.Ҳ. 27 январь куни телеканалда ишловчи ходима аёлни алдаб, иш жойига чақириб, унга шилқимлик қилган.
Жабрланувчининг билдиришича, судланувчи унинг устози бўлган. Ўша куни эркак аёлни бурчакка тақаб, ўпмоқчи бўлган. Шундан сўнг, аёл ИИБга мурожаат қилган.
Аёл бош муҳаррир ўринбосарининг бундай хатти-ҳаракатлари анчадан буён бўлиб келаётганлигини, бу ҳолатдан сўнг асабийлашиб қолганлигини билдириб, суддан эркакка нисбатан қонуний чора кўришни, унга етказилган маънавий зарарни ундириб беришни сўраган.
Судда эркак юқорида кўрсатиб ўтилган қилмишларига иқрор эканлигини, ҳозирда бундан пушаймонлигини билдирган.
Суд қарори билан ТВ масъули Маъмурий жавобгарлик тўғрисидаги кодекснинг 41-1-моддаси 1-қисми (шаҳвоний шилқимлик қилиш)да назарда тутилган ҳуқуқбузарликни содир этган деб топилиб, унга 3 сутка маъмурий қамоқ жазоси тайинланган.
