Жаҳоннинг энг чопқир марафончиси автоҳалокат қурбони бўлди
Спортчи билан бирга унинг мураббийи ҳам ҳаётдан кўз юмган.
Кениялик марафончи ва жаҳон рекордчиси Келвин Киптум автоҳалокатда вафот этди.
Спортчи бошқараётган автомобиль 11 февраль куни Кениянинг Элдорет шаҳри яқинида ҳалокатга учраган. Маҳаллий полиция маълумотларига кўра, Киптум бошқарувни йўқотиб, йўлдан чиқиб кетган ва дарахтга бориб урилган.
Киптум билан бирга унинг мураббийи Жерве Ҳакизимана ҳам вафот этган. Машинада бўлган яна бир аёл тирик қолиб, оғир жароҳатлар билан шифохонага ётқизилган.
24 ёшда бўлган Киптум марафонда бир нечта жаҳон рекордларини ўрнатган. Хусусан, 2023 йил октябрь ойида у Чикаго марафонини 2 соат 35 сонияда босиб ўтган.
Киптум яқин келажакда ўз натижасини яхшилаш ва бу масофани икки соатдан камроқ вақт ичида босиб ўтган биринчи марафончи бўлишни режалаштирган эди.
