"Ливерпул" Хаби Алонсо вакиллари билан музокара ўтказди
Клуб бош мураббий изламоқда.
"Ливерпул" "Байер" устози Хаби Алонсони жамоа бош мураббийлигига таклиф қилмоқчи. Журналист Флориан Плеттенбергнинг ижтимоий тармоқларда хабар беришича, инглиз клуби раҳбарияти испаниялик мутахассис вакиллари билан эҳтимолий ҳамкорлик ҳақида аллақачон боғланган.
Олдинроқ "Ливерпул" бош мураббийи Юрген Клопп жорий мавсум якунланганидан сўнг жамоани тарк этишини маълум қилганди. Эслатиб ўтамиз, Хаби Алонсо 2022 йилдан бери "Байер"ни бошқариб келмоқда.
Германия чемпионатининг жорий мавсумида ўтказилган 22-турдан сўнг испаниялик мутахассис бошчилигидаги "Байер" 58 очко билан турнир жадвалида пешқадамлик қилмоқда.
