Салоҳнинг «Челси»дан кетиш тарихи
У ҳозирги кунда “Ливерпул”да ўнлаб шахсий рекордларни ўрнатишга эришди.
Бугун Муҳаммад Салоҳ Лондоннинг «Челси» клубига қарши бўлиб ўтган Лига кубогида майдонга тушди. Биз бугун ҳужумчи лондонликлар сафини қандай тарк этганини эслашга ҳаракат қиламиз.
Айни вақтда мисрлик футболчи «Ливерпул»нинг энг асосий футболчиси ҳисобланади. Дарвоқе, аввалига у собиқ жамоаси дарвозасига урилган голларни нишонлашдан ўзини тийган.
«Базел» 10 йил олдин яхши келишувга эришди. Жамоа Африкада умуман ҳеч ким танимайдиган футболчи топади. Клуб Салоҳни 2,5 миллион еврога сотиб олади, кейин эса (2014 йилнинг январида) уни Англия жамоасига 16,5 миллион еврога сотади. Бундан ташқари, дастлаб ҳужумчини ўша пайтда Брендан Рожерс бошқараётган «Ливерпул»га ўтказиш бўйича келишув мавжуд эди. Бироқ, «Челси» янада қулайроқ шартларни таклиф қилиб, футболчини сотиб олади.
Салоҳ Кевин Де Брюйне кетганидан кейин бўшаб қолган 15-рақамга эга бўлгани рамзий маънога эга. «Челси» нуқтаи назаридан, мисрлик ва бельгияликнинг ҳикоялари ўхшаш эди. Лондон клуби ҳали ҳам қадрига етилмаган элита футболчиларни эслатиб туради.
«Челси»га ўтгандан сўнг (2014 йил февраль ва март ойларида) Салоҳ Премьер-лигада, энг яхши ҳолатда, иккинчи бўлимда захирадан майдонга тушади. Апрель ва май ойларида ҳужумчи Англия чемпионатининг барча учрашувларида майдонга тушди. Умуман олганда, мавсумнинг иккинчи қисмида у Премьер-лигада 501 дақиқани майдонда ўтказди. Бу вақт ичида эса иккита гол урди ва бир голли узатмани амалга оширди. Камтарона кўрсаткич.
2014 йилнинг ёзида Салоҳ Мисрда ҳарбий хизматни ўташи кераклиги ҳақида маълумот пайдо бўлди. Футболчи армияга бориши шарт эмасди, аммо бундай хабарлар фонида «Челси» ҳужумни сезиларли даражада кучайтирди (Диде Дрогба, Лоик Реми, Диего Коста, Сеск Фабрегас). Натижада Муҳаммад Салоҳ 2014/2015 йилги мавсумнинг биринчи қисмида Премьер-лигада бор-йўғи 30 дақиқа ўтказди (гол ва голли узатмасиз).
Ҳаммаси ҳужумчи клубни тарк этиши томон кетаётганди. АПЛдан таклифлар бўлди, аммо Салоҳ «Фиорентина»га ижарага берилди. 2015 йилнинг январидаги бу трансфер Хуан Куадрадони «Челси»га ўтказиш бўйича келишувнинг бир қисми эди. 2014/2015 йилги мавсумда Лондон клуби ишончли тарзда Англия чемпионлигини қўлга киритди ва трансферлар ўз самарасини бергандек бўлди. Фақат йиллар ўтиб, ким ҳақиқатдан ҳам фойдалироқ экани маълум бўлди. Ва мухлислар биринчи навбатда ўша пайтда «Челси» бош мураббийини айблашди. Жозе Моуринё футболчидан жуда кам фойдаланганди.
Жозе Моуринё:
“Улар Салоҳнинг кетишига рухсат берганимни айтишганда, мен буни аксинча бўлганини тушунтирдим. У «Ливерпул»га борди, мен эса уни «Челси»га олиб келиш учун кўп ҳаракат қилдим. Ҳа, у ҳар дақиқада ўйнашни хоҳлаган, шунинг учун у ижарага беришларини сўради. Шундан кейингина «Челси» уни сотиб юборди. Бунда мен эмас, “Челсининг қарори муҳим бўлди. Ўз навбатида, мен фақат ижарага рози эдим”.
2016 йилда «Челси» Салоҳни «Рома»га 15 миллион еврога сотганди.
Салоҳ «Ливерпул»да клубнинг сўнгги олти йилдаги асосий юлдузига айланди. Жамоа билан у барча турнирларда ғолиб чиқди: Премьер-лига, Англия кубоги, Англия Суперкубоги, Чемпионлар лигаси, УЭФА Суперкубоги, Лига кубоги, клублар ўртасидаги жаҳон чемпионати. Шунингдек, у бир қатор шахсий рекордларни ўрнатди:
Премьер-лига тарихидаги энг яхши африкалик тўпурар (154 гол);
Чемпионлар Лигаси тарихидаги энг яхши африкалик тўпурар (44);
Премьер-лигада чап оёғи билан энг кўп гол урган футболчи (123);
Ливерпул тарихидаги энг яхши тўпурарлар бешлигига кирди (205).
Шу тариқа оддий футболчи ҳозирги вақтда жаҳон футболининг асосий юлдузларидан бирига айланди.
