"Манчестер Сити" ўзига ишонган жамоа"
Рафаэл Бенитес Премьер-лига чемпионлиги учун кураш ҳақида гапирди.
"Ливерпул", "Эвертон" ва "Селта" клубларининг собиқ бош мураббийи Рафаэл Бенитес 2023/2024 йилги мавсумда Англия премьер-лигасида чемпионлик учун кураш ҳақида гапирди.
"Манчестер Сити" ўзига ишонган жамоа. Уларда ротация қилиш ва ғалаба қозонишда давом этиш имконини берувчи яхши таркиб бор. Дам олиш кунларида "Ливерпул" ва "Арсенал"нинг мағлубиятга учраши жамоанинг имкониятларини ошириб юборди. Шунинг учун устунлик энди "Манчестер Сити" томонида, деб ўйлайман", - деди Бенитес.
Англия премьер-лигасининг 33-тур учрашувларидан сўнг “Манчестер Сити” турнир жадвалида биринчи ўринга кўтарилиб олди. Гвардиола жамоаси ҳисобида 73 очко бор. "Арсенал" иккинчи ўринни эгаллаган бўлса, "Ливерпул" кучли учликни якунлаб бермоқда.
