Ҳозирги эпидемик барқарорлик ҳар қачонгидан ҳам муҳим
Санитария-эпидемиология соҳаси ташкил этилганига 90 йил тўлди.
Бугун Санитария-эпидемиологик осойишталик ва жамоат саломатлиги қўмитаси томонидан "Пандемияга қарши тайёргарлик: илмий асослар ва амалий ечимлар" Халқаро илмий-амалийконференция ўтказилди. Ҳозирги кунда юқумли касалликларга қарши янги даво чоралари, юзага келиши мумкин бўлган пандемиянинг олдини олиш бўйича чора-тадбирларни режалаштириш соҳа ходимларининг устувор вазифаларидан бири ҳисобланади. Таъкидлаш жоизки, СОВИД-19 пандемияси бутун дунё учун синовли ва таҳликали даврга айланди. Коронавирус пандемияси даврида дунё миқёсида соғлиқни сақлаш тизимининг глобал пандемия таъсирига тайёргарлик кўриш, унга жавоб бериш бўйича тиббиётда кўплаб камчиликлар аниқланди. Бу эса юзага келиши мумкин бўлган пандемияга қарши курашиш жараёни мақсадли инвестицияларни амалга ошириш, пандемияга тайёргарликни молиялаштириш ва мониторингини доимий равишда олиб бориш, пандемия ва эпидемиялар даврида аниқланган камчиликларни бартараф этишга алоҳида эътибор қаратиш, сиёсий мажбурият, жамоатчилик иштироки ва давлат томонидан молиялаштириш орқали нималарга эришиш мумкинлигини кўрсатди. Пандемиядан олинган сабоқлар инсониятга ҳозирги ва келажакдаги муаммоларни енгишга ёрдам беради. Бутун дунёга хавф солган коронавирус пандемияси даврида санитария-эпидемиология соҳасининг жамият саломатлиги учун нақадар муҳим эканлиги яққол намоён бўлди. Конференция давомида бу ҳақида алоҳида таъкидланди.
"Анжуманда Карантин қоидалари йўлга қўйилган ва касаллик кўпая борган даврда Санитария-эпидемиология тизимининг барча ходимлари касаллик ўчоқларида ўз соғлиғини хавф-хатарга қўйиб, юртдошлари саломатлигини асрашга беминнат ҳисса қўшди. Давлат раҳбари томонидан ўз вақтида қабул қилинган қарор, ҳукуматнинг уюшқоқлик билан олиб борган фаолияти ҳамда Халқаро ташкилотлар кўмагида келтирилган касалликка қарши вакциналар туфайли Ўзбекистон ушбу касалликда жуда паст кўрсаткичдаги талафотлар билан чиқди. Касалликка қарши курашиш борасидаги Ўзбекистон тажрибаси ЖССТ томонидан бир неча бор намуна сифатида кўрсатилди”, - деди Санепидқўмита раиси Баҳодир Юсупалиев.
Тадбир давомида Санитария-эпидемиология соҳаси ривожига узоқ йиллар давомида қўшган салмоқли ҳиссаси ҳамда аҳолининг санитария-эпидемиологик осойишталигини таъминлашдаги машаққатли хизматлари учун бир қатор соҳа вакиллари "Ўзбекистон Республикаси соғлиқни сақлаш аълочиси” кўкрак нишони билан тақдирланишди. Шунингдек, Санитария-эпидемиология соҳаси ривожидаги самарали меҳнати, давлат ва жамоат ишларидаги фаол иштирок этганларга Фахрий ёрлиқлар тантанали равишда топширилди.
Ўзбекистон ҳудудида расман 1933 йилда санитария инспекцияси ташкил этилган бўлиб, 1934 йилда Ўзбекистон санитария-гигиена ва касб касалликлари илмий-тадқиқот институтининг очилиши, Давлат санитария назорати тўғрисидаги Низом ишлаб чиқилгани, нормативлар тасдиқланиши санитария назоратининг янги босқичга кўтарилишида муҳим роль ўйнади. Юртимизга четдан юқумли касалликлар кириб келиши ва аҳоли орасида тарқалишининг олдини олиш, озиқ-овқат хавфсизлигини таъминлаш ишлари тизимли бажарилмоқда. Болаларни юқумли касалликларга қарши бепул эмлаш олиб борилмоқда. Ичимлик суви сифати ва очиқ сув ҳавзалари устидан мониторинг олиб бориш, бозорлар, овқатланиш шохобчалари, жамоат жойларида санитария ҳолатини яхшилаш, атроф-муҳит ҳавосининг мусаффолигини сақлаш чора-тадбирлари амалга оширилмоқда. Соҳа ходимларининг тинимсиз меҳнатлари сабабли юртимизда эпидемик барқарорлик сақланиб қолмоқда ва саломатлик билан боғлиқ кўнгилсиз ҳолатларнинг олди олинмоқда.
