Файзуллаев ҳам финалда ўйнамайди
У Москвага йўл олган.
Ўзбекистон Олимпия терма жамоаси ҳамда Россиянинг "ЦСКА" клуби ярим ҳимоячиси Осиё кубоги финал учрашувини ўтказиб юборади.
Бу ҳақда ЎФА матбуот хизмати хабар берди. Таъкидланишича, футболчи Москвага йўл олган.
“U-23 Осиё кубогида терма жамоамизнинг тарихий натижасига муносиб ҳисса қўшган футболчимиз Аббосбек Файзуллаев келишувга мувофиқ, навбатдаги муҳим ўйинларга тайёргарлик кўриш учун Москвага йўл олмоқда”, — дейилади матбуот хизмати тақдим этган хабарда.
Эслатиб ўтамиз, Аббосбек Файзуллаев терма жамоа сафига турнир ярмида келиб қўшилган ва Ўзбекистон Олимпия терма жамоасининг чорак ва ярим финал баҳсларида асосий таркибда майдонга тушган эди.
