Жаҳон чемпионатида муваффақиятли иштирок этган ўзбекистонлик пара каноэчилар тантанали кутиб олинди
Улардан 4 нафар иштирокчи ёзги Паралимпия ўйинларига тўғридан-тўғри лицензияни қўлга киритган.
8-12 май кунлари Венгриянинг Сегед шаҳрида ўтказилган Жаҳон чемпионатида муваффақиятли иштирок этган пара каноэ бўйича Ўзбекистон терма жамоаси аъзолари бугун тонгда қайтиб келишди.
Матонатли пара атлетлар Тошкент халқаро аэропортида Ўзбекистон Миллий паралимпия қўмитаси раҳбарияти, спортчи ва мураббийлар, оила аъзолари ҳамда оммавий ахборот воситалари вакиллари томонидан тантанали кутиб олинди.
Эслатиб ўтамиз, Венгриядаги Жаҳон чемпионатида 4 нафар ҳамюртимиз - Шаҳзода Мамадалиева (ВЛ3), Иродахон Рустамова (ВЛ2), Шахноза Мирзаева (КЛ3) ва Хасан Қўлдашев (КЛ3) Париж-2024 ёзги Паралимпия ўйинларига тўғридан-тўғри лицензияни қўлга киритди.
