Нурхон Қурбонова кетма-кет иккинчи бор жаҳон чемпиони бўлди
Шунингдек, Сафия Бурханова ўз йўналишида тенгсиз эканини исботлади.
Кобе шаҳрида давом этаётган пара енгил атлетика бўйича жаҳон чемпионатидан хушхабарлар келиши давом этмоқда.
Аёллар ўртасида Ф54 классида найза улоқтириш дастурида иштирок этган ҳамюртимиз Нурхон Қурбонова 20.73 метр натижа билан олтин медалга сазовор бўлди.
Нурхон Қурбонова 2023 йил Парижда бўлиб ўтган жаҳон чемпионатида Ф54 классида найза улоқтириш дастурида 20.15 метр натижа билан олтин медаль ва Париж-2024 ёзги Паралимпия ўйинларига тўғридан-тўғри лицензияни қўлга киритган эди.
Шунингдек, аёллар ўртасида Ф12 классида ядро улоқтириш дастурида стартга чиққан ҳамюртимиз Сафия Бурханова 13.05 метр натижа қайд этган ҳолда олтин медалга сазовор бўлди.
Эслатиб ўтамиз, Сафия Бурханова 2023 йил Парижда бўлиб ўтган жаҳон чемпионатида 13.72 метр натижа билан кумуш медаль ҳамда Париж-2024 ёзги Паралимпия ўйинларига тўғридан-тўғри лицензияни қўлга киритган эди.
