Тошкент аэропортида 203 млнлик дорилар тўхтатиб қолинди

Бугун, 22 июл куни Тошкент халқаро аэропортида 203 млн сўмлик дорилар Ўзбекистон ҳудудига олиб кирилаётганда тўхтатиб қолинди. Бу ҳақида “Тошкент - АЭРО” ИБК ахборот хизмати маълум қилди.

 

Қайд этилишича, Деҳли — Тошкент йўналиши бўйича учиб келган Ўзбекистон фуқаросининг 2 дона қора рангли қўл сумкаси ичидан божхона назоратига белгиланган тартибда тақдим этилмаган, оғзаки сўровда маълум қилинмаган, ҳеч қандай рухсат этувчи ҳужжатларга эга бўлмаган, олиб кириш меъёридан ортиқ бўлган умумий қиймати 132 млн сўм бўлган 465 дона ҳар хил турдаги ва номдаги дори воситалари борлиги аниқланган.

 

Худди шу рейс билан учиб келган яна бир Ўзбекистон фуқаросининг 1 дона қора рангли қўл сумкаси ичидан божхона назоратига белгиланган тартибда тақдим этилмаган, оғзаки сўровда маълум қилинмаган, ҳеч қандай рухсат этувчи ҳужжатларга эга бўлмаган, олиб кириш меъёридан ортиқ бўлган умумий қиймати 46 млн 285 минг сўм бўлган жами 381 дона ҳар хил тур ва номдаги дори воситалари борлиги маълум бўлган.

 

Шунингдек, айнан мазкур рейс билан учиб келган яна бир Ўзбекистон фуқароси хатти-ҳаракатларида ҳам шу ҳолат такрорланган. Фуқаронинг бир дона кўк рангли йўл сумкаси ичидан божхона назоратига белгиланган тартибда тақдим этилмаган, оғзаки сўровда маълум қилинмаган, ҳеч қандай рухсат этувчи ҳужжатларга эга бўлмаган, олиб кириш меъёридан ортиқ бўлган умумий қиймати 25 млн сўм бўлган жами 121 дона 4 турдаги дори воситалари борлиги аниқланган.

 

Ҳозирда ушбу ҳолатлар юзасидан суриштирув ҳаракатлари олиб борилмоқда.