Бир қанча авиакомпаниялар парвоз йўналишларини ўзгартирди
Бунга Эрон ҳаво ҳудудининг ёпилиши сабаб бўлмоқда.
Эрон устидаги ҳаво ҳудудининг ёпилиши муносабати билан бир қанча авиакомпаниялар парвоз йўналишларини ўзгартирди. Бу ҳақида "Uzbekistan airports" хабар бермоқда.
Яқин Шарқдаги кескин вазият сабаб "Jazeera airways" авиакомпаниясининг Тошкент – Қувайт йўналиши бўйича Ж9-1650 рейси соат 04:50да учиб Тошкент аэропортига қайтди – самолёт маҳаллий вақт билан соат 07:06да жўнаш аэропортига қўнди.
Шунингдек, "Fly Dubai" авиакомпаниясининг Душанбе – Дубай йўналиши бўйича Ф3-778 рейси экипажи Тошкентдаги муқобил аэродромга йўл олишга қарор қилди. Самолёт маҳаллий вақт билан соат 08:32 да Тошкентга келиб қўнди. Экипажнинг дам олиши муносабати билан Тошкентдан учиш маҳаллий вақт билан соат 21:00га белгиланган. Йўловчилар меҳмонхонага жойлаштирилади.
"Fly Dubai" авиакомпаниясининг Тошкент – Дубай йўналиши бўйича рейси ҳам соат 04:58да ҳавога кўтарилиб, 06:58 да Ашхободдаги муқобил аэродромга қўнди. Шунингдек, Мадина – Фарғона йўналиши бўйича рейс ҳам Тошкент вақти билан соат 08:17 да Ал-Мактум (Дубай) аэропортига қўнган.
