“Реал Мадрид” йиллик даромади бўйича рекорд қўйди
Ўйинлардан тушган даромад икки баробарга ошган.
Мадриднинг «Реал» клуби ўтган мавсумда 1,05 миллиард евро даромад кўриб, энг даромадли футбол клуби сифатида яна етакчилик қилди. 2023/24 йилги мавсумда “Бернабеу” стадионининг реконструкцияси якунланиши натижасида ўйинлардан тушган даромад икки баробарга ошиб, 248 миллион еврога етди. Шунингдек, клубнинг тижорий даромадлари 19 фоиз ўсиб, 482 миллион еврога етди. Бу ўсишга янги ҳомийлик келишувлари ва сувенир маҳсулотларининг кўпайиши сабаб бўлди.
15 карра европа чемпиони бўлган “Реал Мадрид” ҳозирда клуб мулкчилигини унинг аъзоларига ўтказиш бўйича йирик корпоратив ўзгаришларни режалаштирмоқда. Клуб президенти Флорентино Переснинг таъкидлашича, ушбу ислоҳот орқали «Реал»нинг 100 минг аъзоси клубнинг ҳақиқий эгалари бўлишади.
“Бизнинг активларимиз 10 миллиард евродан ортиқ баҳоланади, ва биз уларни аъзолар ўртасида тақсимлашимиз мумкин”, – деди Перес.
Таклиф клуб аъзолари томонидан овозга қўйилиши кутилмоқда.
