Туркияда фирибгарлар 45 минг йилга қамалди
Улар молиявий пирамида ташкил этган.
Туркияда молиявий пирамида ташкил этган ака-ука Меҳмет ва Фатиҳ Айдин 45 минг йил 3 ойга озодликдан маҳрум этилди. Уларнинг тузоғига тушган жабрланувчилар сони ўн минглаб кишига етган.
2016 йилда Айдин ака-укалари сармояни онлайн ўйин билан бирлаштириш ғоясини ўйлаб топишди. Улар "Фермер банки" номли ўйин яратиб, фойдаланувчиларга инвестиция киритиш эвазига виртуал фермер хўжаликларини ривожлантириш имкониятини таклиф қилишди. Фирибгарлар бу маблағлар ҳақиқий қишлоқ хўжалиги техникаси, чорва моллари ва бошқа активларни сотиб олишга сарфланишини айтишган.
Шунингдек, улар ишлаб чиқарилган маҳсулотлар махсус дўконларда сотилишини ва ўйин иштирокчилари бу жараёндан фойда кўришини ваъда қилишди. Аммо ҳақиқат бошқача бўлиб чиқди — лойиҳа молиявий пирамида сифатида фош этилди ва эгаларидан бири $100 миллиондан ортиқ маблағ билан ғойиб бўлди.
Фирибгарларнинг рекорд даражадаги жазо муддати улар устидан берилган 4 мингдан ортиқ шикоятлар бўйича ҳукмлар йиғиндиси асосида белгиланди. Дастлаб, Туркия прокуратураси уларни 88 минг йилга озодликдан маҳрум этишни талаб қилган эди.
