Тайванда “Чампи” тўфони хавфи: қарийб мингта авиарейс бекор қилинди
Табиий офат оқибатида бир киши ҳалок бўлди, 163 киши жароҳатланди.
Тайванда “Чампи” тўфони яқинлашиши сабабли ҳудудларнинг катта қисмида фаолият тўхтатилди. Кучли шамол ва жала ёмғирлар кузатилаётган оролда 262 та ички ва 717 та халқаро авиарейс бекор қилинди. Бу ҳақда Reuters хабар берди.
Тайвань Марказий метеорология бошқармаси маълумотига кўра, тўфон маркази яқинидаги шамол тезлиги соатига 191 километрга етган. У оролдан шарқда, тахминан 170 километр масофада жойлашган. Прогнозларга кўра, тўфон жума куни кечқурун Тайваннинг шимоли-шарқий қирғоқлари яқинидан ўтиб, Хитой қирғоқлари томон йўналади ва кейинчалик Япониянинг жанубига етиб боради.
Табиий офат оқибатида бир киши ҳалок бўлган, 163 киши жароҳатланган. Ҳукумат тоғли ҳудудлардан 2 639 кишини эвакуация қилган. Шунингдек, 77 мингдан ортиқ хонадон электр таъминотисиз қолган, бироқ кейинчалик уларнинг аксариятида электр энергияси тикланган.
Метеорологлар тўфоннинг шамол таъсир қиладиган ҳудуди қарийб 320 километрни ташкил этишини билдирди. Мутахассислар унинг таъсири қарийб икки кун давом этиши мумкинлигини прогноз қилмоқда. Тайваннинг шимолий тоғли ҳудудларида, жумладан, пойтахт Тайбэй атрофида бир метргача ёмғир ёғиши кутилмоқда.
Маҳаллий ҳокимиятлар хавфли ҳудудларда қум солинган қопларни тарқатиб, қутқарув техникаларини шай ҳолатга келтирган. Айрим қирғоқбўйи ҳудудлари аҳолисига шамол тезлиги соатига 150 километрдан ошиши мумкинлиги ҳақида огоҳлантиришлар юборилган.
Тўфон сабабли Тайвань молия бозорлари ҳам жума куни фаолиятини тўхтатди. Мамлакатнинг шимоли ва жанубини боғловчи тезюрар темирйўл қатнови эса одатдаги тартибда давом этди. Пойтахт Тайбейда метро ва бошқа жамоат транспорти хизматлари қисқартирилган жадвал асосида ишлади.
Дунёдаги энг йирик шартнома асосида микрочип ишлаб чиқарувчи TSMC компанияси тўфон унинг фаолиятига жиддий таъсир кўрсатмаганини ва иш жараёнлари одатдаги тартибда давом этаётганини маълум қилди.
Прогнозларга кўра, “Чампи” тўфони дастлаб Япониянинг Окинава префектурасидаги Ёнагуни ороли яқинидан ўтади.
