Криштиану Роналду “Валенция”ни сотиб олмоқчи
У буни Муҳаммад бин Салмон билан ҳамкорликда амалга оширмоқчи.
Португалиялик машҳур ҳужумчи Криштиану Роналду Испаниянинг номдор клубларидан бири – “Валенция”ни сотиб олишга қизиқиш билдирмоқда. Х ижтимоий тармоғидаги ТСР саҳифаси тарқатган маълумотга кўра, футболчи бу харидни амалга ошириш учун Саудия Арабистони валиаҳд шаҳзодаси Муҳаммад бин Салмон билан ҳамкорликни режалаштирган.
Қироллик оиласи вакили ушбу битимнинг молиявий томонини назорат қилади ва Роналдунинг расмий шериги бўлади. Эътиборлиси, шаҳзоданинг инвестиция жамғармаси Англиянинг “Нюкасл” клуби акцияларига ҳам эгалик қилади.
Айни пайтда “Валенция” клуби цингапурлик бизнесмен Петер Лим Энг Ҳокга тегишли бўлиб, у жамоани 2014 йилда сотиб олган. Испаниянинг энг совриндор клубларидан бири саналган “Валенция” Ла Лига чемпионлигини 6 марта, Испания Кубогини эса 8 марта қўлга киритган. Клуб, шунингдек, икки бор УЭФА Чемпионлар Лигаси финалида иштирок этган.
Ҳозирги мавсумда жамоа Ла Лигада оғир вазиятга тушиб қолган бўлиб, 25-турдан кейин 18-ўринни эгаллаб турибди. Бу эса жамоанинг қуйи лигага тушиб кетиш хавфини оширмоқда.
