Бокс расман Олимпиада-2028 дастурига киритилди

Халқаро олимпия қўмитаси (ХОҚ) сессияси якдиллик билан бокс спортини 2028 йилда Лос-Анжелесда ўтадиган Олимпия ўйинлари дастурига киритиш таклифини маъқуллади.

 

Токио-2020 ва Париж-2024 Олимпиадаларида ХОҚ бокс мусобақаларини мустақил ташкил қилган эди. Бунинг сабаби Халқаро бокс ассоциацияси (IBA) билан ҳакамлик, бошқарув, молия ва Россия билан алоқалар масалалари бўйича давом этаётган низолар эди. ХОҚ даcтлаб IBA билан ҳамкорликни тўхтатган, 2023 йилда эса уни Олимпия ҳаракатидан чиқариб ташлаган эди.

 

Мусобақаларни ташкил этишда янги ҳамкор сифатида вақтинчалик World Boxing ташкилоти танланди. Олимпиадага йўлланма олиш ва унда қатнашиш учун миллий федерациялар айнан шу ташкилот аъзоси бўлиши шарт.

 

World Boxing раҳбари Борис ван дер Ворст “ТАСС” агентлигига берган интервюсида россиялик боксчиларнинг 2028 йилги Олимпиадада иштирок этиш имконияти муҳокама қилиниши мумкинлигини маълум қилди.

 

Маълумот учун, Лос-Анжелес-2028 Олимпия ўйинлари 2028 йилнинг 14–30 июл кунларида бўлиб ўтади.