Самарқандда ота фарзандлари учун алиментни олдиндан тўлади
Масъулиятли ота фарзандларининг 18 ёшгача бўлган алиментини тўлиқ тўлади.
Самарқанд шаҳрида яшовчи фуқаро фарзандларининг моддий таъминоти учун тўланиши керак бўлган алимент пулини тўлиқ олдиндан тўлади. Бу ҳақда Мажбурий ижро бюроси вилоят бошқармаси ахборот хизмати хабар берди.
Маълум қилинишича, 2023 йил 12 февралдаги Самарқанд шаҳар фуқаролик судининг ижро ҳужжатига асосан, қарздор С.Д. вояга етмаган икки нафар фарзанди учун собиқ турмуш ўртоғи Ш.A. фойдасига алимент тўлашга мажбур бўлган.
Ота ўз мажбуриятини чуқур англаб, болалари 18 ёшга тўлгунига қадар белгиланган жами алимент суммасини собиқ турмуш ўртоғи билан келишган ҳолда олдиндан тўлашга қарор қилган ва бу ҳақда МИБнинг Самарқанд шаҳардаги бўлимига мурожаат қилган. Давлат ижрочиси томонидан ҳисоблаб чиқилган 25 минг АҚШ доллари миқдоридаги маблағ собиқ турмуш ўртоғига тўлиқ равишда топширилган.
