Тошкентда 11 ёшли қиз ток уриб вафот этди
Ҳолат юзасидан шаҳар ИИББ маълумот берди.
Ижтимоий тармоқларда Тошкент шаҳрининг Миробод туманида 11 ёшли қиз ток уриши натижасида вафот этгани ҳақидаги хабарлар тарқалиб, турли муҳокамаларга сабаб бўлмоқда. Мазкур ҳолат шаҳар ИИББ расмий муносабат билдирди.
Қайд этилишича, 30 май куни соат 18:00 да Миробод тумани Амир Темур кўчасидаги савдо дўконларидан бирининг том қисмига 2014 йилда туғилган N.A. укасининг ўйинчоғини олиб тушиш учун нарвон ёрдамида чиққан. Қайтиб тушаётган вақтида том қисмига яқин жойдан ўтувчи электр токини ушлаб олган ва ток уриши натижасида воқеа жойида вафот этган.
Мазкур ҳолат юзасидан Жиноят кодексининг 257-моддаси 2-қисми «а» банди (“Меҳнатни муҳофаза қилиш қоидаларини бузиш, одам ўлишига сабаб бўлса”) билан жиноят иши қўзғатилган. Тергов ҳаракатлари давом этмоқда.
