Исроилдаги ўзбекистонликлар учун Тошкентга чартер парвоз ташкил этилди
Акабадан чартер рейс бугун, 24 июнь куни амалга оширилади.
Ўзбекистонлик фуқароларни олиб келиш учун Иорданиядан Тошкентга чартер рейс амалга оширилади.
24 июнь куни Иорданиянинг Акаба шаҳридан Тошкентга махсус чартер рейси ташкил этилади. Бу парвоз Исроилда бўлган ўзбекистонлик фуқароларни ватанга қайтариш мақсадида амалга оширилмоқда. Бу ҳақда Исроилнинг Ўзбекистондаги элчихонаси хабар берди.
Элчихонанинг хабарига кўра, “Fly Khiva” авиакомпаниясининг FKH9902 рақамли чартер рейси 24 июнь куни маҳаллий вақт билан соат 19:10 да Акабадан ҳавога кўтарилади ва Тошкентга 25 июнь куни соат 02:40 да етиб келади.
Элчихона фуқароларга чегарадан ўтишда хорижга чиқиш учун амалдаги паспорт ҳамда бошқа зарур ҳужжатлар бўлиши шартлигини эслатмоқда.
Шунингдек, авиабилет хариди, Иордания визасини расмийлаштириш, шунингдек, Тел-Авивдан Иордания чегарасигача бўлган трансфер хизмати юзасидан +972 53-556-5254 рақами орқали (WhatsApp орқали ҳам) мурожаат қилиш мумкин.
Элчихона парвоз вақти авиакомпания ёки маҳаллий ҳокимият кўрсатмаларига кўра ўзгариши мумкинлигини ҳам алоҳида таъкидлади.
