Роналду “Ал-Наср” клубида қоладиган бўлди
Футболчи клуб билан янги шартнома тузди.
Криштиану Роналду Саудия Арабистонининг “Ал-Наср” клубида қоладиган бўлди. Бу ҳақида клуб матбуот хизмати хабар берди.
Жамоа билан шартнома муддати тугаётгани учун Осиёдан кетиши мумкинлиги айтилган футболчи клуби билан 2027 йилгача амал қиладиган янги шартнома тузган.
Маълумот учун, португалиялик футболчи ушбу клубга 2023 йил январь ойида қўшилганди. Ўтган мавсумда у барча мусобақаларда 35 та гол урди ва 4 та голли узатма амалга оширди. Шунга қарамай, “Ал-Наср” ушбу мавсумда ҳеч қандай совринни қўлга кирита олмади. Саудия Про-лигасида жамоа 70 очко жамғариб, учинчи ўринда якунлади.
