Мессига Саудиянинг супер шартномаси таклиф қилинди
Таклиф Роналдонинг Ал Нассрга ўтганидаги шартнома даражасида.
Саудия Арабистонининг PIF (Public Investment Fund) жамғармаси Лионел Мессини Интер Миамидан олиб чиқиб кетиш учун улкан молиявий таклиф билан чиққани маълум бўлди. Бу таклиф Сристиано Роналдонинг Ал Нассрга ўтганидаги шартнома даражасида бўлиб, имзо пули ва йиллик маошни ҳам ўз ичига олади.
Таклиф Месси вакили ва отаси Хорхе Мессига расмий тарзда тақдим этилган. Манбаларга кўра, PIF вакиллари аллақачон Хорхе Месси билан музокаралар олиб борган ва улкан молиявий пакетни келишишга ҳаракат қилмоқда.
PIF назорати остидаги клублар ичида айниқса Ал Ҳилал клуби етакчи номзод сифатида ажралиб турибди. 31 май куни Месси билан Саудия томони музокара бошлагани ҳақида хабарлар чиққан эди, энди бу ҳаракатлар яна фаоллашган.
Ҳозирда Месси Интер Миамининг FIFA Клублар ўртасидаги Жаҳон чемпионати иштирокига эътибор қаратган бўлсада, Саудия томони уни жалб этиш учун жиддий уринмоқда.
