Қишлоқ хўжалигига тўғридан-тўғри инвестициялар рағбатлантирилади

 

Ўзбекистон Президенти томонидан “Мамлакатимизга тўғридан-тўғри хорижий инвестицияларни жалб этишни рағбатлантиришнинг қўшимча чора-тадбирлари тўғрисида”ги фармон имзоланди. Ҳужжат билан хорижий сармоядорлар учун яна бир янги йўналиш – қишлоқ хўжалиги маҳсулотларини етиштириш соҳаси инвестициялар учун имтиёзли тармоқлар рўйхатига киритилди.

 

Бу дегани, эндиликда хорижий инвесторлар Ўзбекистон ҳудудида қишлоқ хўжалиги маҳсулотларини етиштириш билан шуғулланишда солиқ ва кредит имтиёзларидан фойдаланиш имконига эга бўлади.

 

Имтиёзли йўналишларга қишлоқ хўжалиги ҳам қўшилди.

 

Ҳозиргача хорижий инвестициялар учун имтиёзлар қуйидаги соҳаларда амал қилган:

• Радиоэлектрон ва компьютер саноати,
• Енгил саноат (газлама, пойабзал, тикувчилик, тери маҳсулотлари),
• Ипакчилик,
• Қурилиш материаллари,
• Паррандачилик,
• Озиқ-овқат маҳсулотларини қайта ишлаш (ичимлик ва тамаки бундан мустасно),
• Гўшт-сут маҳсулотлари ишлаб чиқариш,
• Кимё ва фармацевтика саноати.

 

Эндиликда уларга қишлоқ хўжалиги маҳсулотларини етиштириш йўналиши ҳам қўшилди.

 

Чорвачилик учун кредит енгилликлари

 

Фармон асосида чорвачилик учун озуқабоп экинлар етиштираётган қишлоқ хўжалиги субъектларига – фермер ва деҳқон хўжаликларига – ҳар бир гектар учун 15 миллион сўмгача имтиёзли кредит берилади. Бу маблағлар 6 ой муддатда, Марказий банкнинг асосий ставкасидан юқори бўлмаган фоизда (2 фоизи банк маржаси) ажратилади.

 

Солиқ кодексида белгиланган алоҳида имтиёзлар Тошкент шаҳри ва Тошкент вилоятининг 1–3 тоифадаги туман ва шаҳарларидан ташқари, қолган барча ҳудудлардаги сармоядорларга татбиқ этилади.

 

Президент фармонида таъкидланишича, бу ўзгаришлар мамлакатда инвестиция муҳитини яхшилаш, ишлаб чиқариш ва хизматлар соҳасига сармоя жалбини кенгайтириш, шунингдек, хорижий инвесторлар учун ишончли ҳуқуқий ҳимоя ва кафолатларни таъминлаш мақсадида қабул қилинган.