Пенсиялар электрон ҳисобланади: янги онлайн хизмат йўлга қўйилади
“Менинг пенсиям” хизмати орқали фуқаролар пенсия миқдорини олдиндан билишлари мумкин.
Ўзбекистонда фуқаролар пенсия миқдорини олдиндан аниқлаш имкониятига эга бўлишади. Бу “Менинг пенсиям” деб номланган янги онлайн хизмат орқали амалга оширилади. Тизим 2026 йил 1 декабрдан бошлаб ишга туширилади.
Президентнинг тегишли фармонида пенсия ва ғазначилик тизимларини рақамлаштириш, хизматларни тўлиқ электрон шаклга ўтказиш бўйича қатор топшириқлар белгиланган. Жумладан, пенсия таъминотига оид барча хизматлар проактив ва интерактив бўлиб, аҳоли мурожаатисиз автоматик кўрсатилади.
Шунингдек, “Рақамли ғазна” тизими орқали бюджет жараёнлари автоматлаштирилади. 2026 йил 1 июлдан бошлаб мазкур тизим ишга туширилади.
Бугунги кунда Ўзбекистонда пенсия олувчилар сони 4,2 миллион нафарга етган. 2025 йил 1 июлдан бошлаб пенсия ва нафақалар 10 фоизга оширилиши белгиланган.
Энг кам миқдордаги пенсия ва нафақалар (ойлик ҳисобда):
Ногиронлик пенсияси: 1 012 000 сўм
Ёшга доир пенсия (энг кам): 918 000 сўм
Меҳнатга лаёқатсизлар учун нафақа: 1 012 000 сўм
Боқувчисини йўқотганлар учун нафақа: 820 000 сўм
Уруш қатнашчилари учун пенсия: 4 462 000 сўм
Пенсияни ҳисоблашнинг базавий миқдори: 471 000 сўм (2025 йил 1 июлдан).
