Қашқадарёда оилавий можаро фожиа билан якунланди
Эрини пичоқ билан ўлдирган аёлга суд ҳукми ўқилди.
Қашқадарёда эрини ошхона пичоғи билан ўлдирган аёлга суд ҳукми эълон қилинди. Жиноят ишлари бўйича Касби туман суди аёлни айбдор деб топиб, унга 6 йил муддатга озодликдан маҳрум қилиш жазосини тайинлади.
Аниқланишича, воқеа аввалроқ аёлнинг турмуш ўртоғи томонидан талаба қизи ва ўзига нисбатан ҳақоратли сўзлар ишлатилганидан кейин содир бўлган. Эркак 8 йиллик меҳнат муҳожирлигидан сўнг уйга қайтиб, меҳмонлар иштирокидаги зиёфат чоғида аёлини ва қизини хиёнатда айблаб, оғир ҳақорат қилган.
Аёлнинг айтишича, воқеа куни кечаси яна жанжал бошланган. У ўзини ва қизини ҳимоя қилиш мақсадида, жаҳл устида эрининг бўйин қисмига икки марта пичоқ билан зарба берган.
Суд жараёнида аёл қилган ишини тан олиб, “Мен эримдан ҳаётим учун хавфсирадим. У мени ўлдирмоқчи бўлди. Мен атайлаб қилмаганман”, деган.
