22 мингдан ортиқ сайёҳ: Франция Ўзбекистонга туристлар оқими бўйича Европанинг топ-5 мамлакатига кирди

2026 йилнинг январь–август ойларида Ўзбекистонга Франциядан 22 055 нафар сайёҳ ташриф буюрди. Бу ўтган йилнинг шу даврига нисбатан 20,6 фоизга кўп.

Шу тариқа Франция Ўзбекистонга кирувчи туризм ҳажми бўйича Европанинг етакчи бешта мамлакатидан бирига айланди. Париж ва Тошкент ўртасидаги тўғридан-тўғри авиақатновлар ҳам сайёҳлар оқимини янада ошириш учун муҳим омиллардан бири бўлиб қолмоқда.

Икки мамлакат ўртасидаги туризм ҳамкорлиги сайёҳлар алмашинуви билангина чекланмаяпти. Франция компаниялари Ўзбекистондаги йирик туризм инфратузилмаси лойиҳаларида ҳам иштирок этмоқда.

Жумладан, тоғ инфратузилмасига ихтисослашган MND компанияси Чимёнда тўрт фаслда фаолият юритадиган курорт яратиш лойиҳасига жалб этилган. Канат йўллари ишлаб чиқарувчи POMA компанияси эса Чимён ва Зоминдаги лойиҳаларни кўриб чиқмоқда.

Шунингдек, қатор француз компаниялари Бельдерсой–Чимён–Нанай халқаро курорти концепциясини ишлаб чиқишда иштирок этган. Меҳмонхона соҳасида Франциянинг Accor гуруҳи Ўзбекистонда Mercure, Mövenpick, Swissôtel, ibis ва Novotel брендлари билан фаолият юритмоқда.

Ўзбекистоннинг Парижда ўтказилган IFTM Top Resa 2026 халқаро туризм кўргазмасида Country of Honour мақомида иштирок этиши ҳам икки мамлакат ўртасидаги алоқаларни кенгайтириш учун янги имконият бўлди.

Туризм қўмитаси Ўзбекистоннинг Франциядаги элчихонаси билан ҳамкорликда мамлакатнинг сайёҳлик салоҳиятини намойиш этди. Кўргазма доирасида Ўзбекистон, Франция ва бошқа давлатларнинг туроператорлари, авиакомпаниялар, меҳмонхона бизнеси вакиллари ҳамда соҳанинг бошқа иштирокчилари билан B2B учрашувлар ўтказилди.

Айни пайтда Ўзбекистон халқаро бозорга тақдим этаётган туризм маҳсулотлари ҳам кенгайиб бормоқда. Тарихий шаҳарлар бўйлаб анъанавий йўналишлар билан бир қаторда тоғ, соғломлаштириш, гастрономик, экологик ва MICE туризми имкониятлари ривожлантирилмоқда.

Ҳудудларда амалга оширилаётган янги лойиҳалар Буюк Ипак йўлининг анъанавий маршрутларини тўлдириб, хорижий сайёҳлар учун мамлакатнинг турли ҳудудларига ташриф буюриш имкониятларини кенгайтирмоқда.

IFTM Top Resa 2026 кўргазмасида Ўзбекистон янгиланган миллий стенд концепциясини ҳам тақдим этди. Унда замонавий дизайн анъанавий меъморчилик ва маданият унсурлари билан уйғунлаштирилиб, ёғоч, керамика ва муқarnas элементларидан фойдаланилган.