Ички рейсларга рўйхатдан ўтиш янада осонлашди
Энди электрон ҳужжатлар билан рўйхатдан ўтиш мумкин.
Вазирлар Маҳкамаси қарорига кўра, 1-июлдан йўловчилар маҳаллий йўналишлардаги парвозларга шахсини тасдиқловчи ҳужжатларнинг электрон вариантидан фойдаланган ҳолда рўйхатдан ўтиши мумкин бўлади.
Аэропортда рўйхатдан ўтишдан олдин йўловчи my.gov.uz сайти/мобил иловаси ёки “Ижтимоий карта” мобил иловасидаги шахсий кабинетига кириб, шахсий маълумотлар саҳифасига ўтади ва электрон шаклда шахсни тасдиқловчи ҳужжатларни рўйхатдан ўтиш жойидаги ходимга кўрсатади.
Таъкидланишича, фақат my.gov.uz сайти/мобил иловаси ёки “Ижтимоий карта” мобил иловасидаги жорий маълумотлар шахсни тасдиқловчи ҳужжат сифатида қабул қилинади, шунинг учун рўйхатдан ўтиш пайтида шу каби ҳужжатларнинг нусхалари, фотосуратлари, паспорт/IDнинг сканерланган вариантлари ёки шахсий маълумотлар бўлган веб-сайт саҳифасининг “скриншот”лари қабул қилинмайди.
