Катта кредит ваъдаси ортидаги фирибгарлик фош бўлди
Тошкентда фуқарога 3 млн доллар кредит олиб бермоқчи бўлган МЧЖ раҳбари ушланди.
Тошкент шаҳрида савдо фаолияти билан шуғулланувчи МЧЖ раҳбари бўлган, илгари судланган аёл яна жиноят устида қўлга тушди. У Қибрай туманида яшовчи фуқарога ўзининг “алоқадор танишлари” ёрдамида банкдан 3 миллион АҚШ доллари кредит олиб беришини ваъда қилган.
Бунинг эвазига у кредит маблағининг 33 фоизини — 990 минг долларни сўраган. Аёл олдиндан 150 минг долларни олган вақтда Давлат хавфсизлик хизмати ҳамда Иқтисодий жиноятларга қарши курашиш департаменти томонидан ўтказилган тезкор тадбирда ушланди.
Суриштирув давомида аёл билан бирга ҳаракат қилган бошқа шахс ҳам аниқланди. У Урганчда яшовчи 1983 йилда туғилган эркак бўлиб, ўзини банк ходими сифатида таништириб, фуқарога кредитни ажратишга ваъда берган.
Ҳар иккала гумонланувчига нисбатан Жиноят кодексининг тегишли моддалари асосида жиноят иши қўзғатилиб, қамоққа олиш эҳтиёт чораси қўлланилди. Ҳозирда дастлабки тергов ишлари давом этмоқда.
