Андижонда профилактика инспекторини пичоқлаб ўлдирган шахс топилди

Андижон вилояти Хўжаобод туманида хизмат бурчини адо этаётган вақтда ҳалок бўлган ҳудуд профилактика инспектори — катта лейтенант Абдурасул Абдувалиевнинг ўлимига сабабчи бўлган 65 ёшли Й. Холбозоров ушланди. Бу ҳақда Ички ишлар вазирлиги матбуот хизмати хабар берди.

 

Воқеа 2025 йил 1 июль куни «Юксалиш» маҳалласида юз берган. Маст ҳолатда ўз яқинларига пичоқ билан таҳдид қилаётган фуқарога нисбатан чора кўриш вақтида, А. Абдувалиев кўкрагига оғир тан жароҳати олган. Шифохонага олиб кетилаётган пайтда у вафот этган. Ушбу мудҳиш воқеа жамоатчилик орасида катта резонанс уйғотди.

 

Гумонланувчи Й. Холбозоров воқеадан сўнг дарҳол қочиб, қидирувга берилди. 4 июль куни эрталаб соат 06:30 ларда у "Юксалиш" маҳалласидаги "Сўқолоқ" қабристонида, маккажўхори поясида яшириниб ётган ҳолатда топилди. Уни қўлга олиш жараёнида ўз жонига суиқасд қилишга уринган — қорин қисмига пичоқ билан жароҳат етказган. Тез ёрдам кўрсатилганидан сўнг у шифохонага ётқизилган.

 

Ҳозирда унга нисбатан Ўзбекистон Республикаси Жиноят кодексининг 97-моддаси 2-қисми "г" банди — яъни “хизмат ёки фуқаролик бурчини бажараётган шахсни қасддан ўлдириш” моддаси билан жиноят иши қўзғатилиб, тергов ҳаракатлари олиб борилмоқда.

 

Маълумот учун, жиноят кодексига кўра, ушбу моддада назарда тутилган жиноят 15 йилдан 25 йилгача ёки умрбод озодликдан маҳрум қилиш жазоси билан баҳоланади.

 

Ички ишлар вазирлиги жиноятчини топиш ва қўлга олишда кўмак берган фуқароларга миннатдорлик билдирди.